Psa 109 | MMX | STEP | Moroa, nenu xusuk mun, nia a emi asu minu, la nemen gat utam pamngus,

Psalms 109

1 Moroa, nenu xusuk mun, nia a emi asu minu, la nemen gat utam pamngus, 2 mila limixin kapmek la limixin sosolo arup, mo nga di paase sox ia, la dira li laxaxarang mavana rak. 3 Di xarang taba ia, mi laxalinga bele ngatngas atdi; dik sok taba parang mun ia mi levelinga la kopmen tavasuun teren. 4 Nia agat kis etangas eburu midi la aga ngising tidi, ketla dixo tu tooro ba ia. 5 Di vorang amlong lununuan tarak tidi mi laxakapmek, la lixitkis etangas tarak tidi di vorang i mi lebele ngatngas atdi.

6 O Moroa, una lok katling ka taradi sosolo arup, kusu ri lok li laradi munepen minia at lavapaase, la mo laradi sosolo arup naba sok taba i mi levelinga. 7 La do dina ronga linga ren, a vara i xusu diba vuse ka laxapmek teren; la i epovo do limixin dina ronga levesingising teren la dinaba ronga xibis i do ni laradi xapmek. 8 A vara i xusu levenaleng at lorooro ren na xap kot; a vara i do tara vetpes na lok ka lixitkis amgomgo ren. 9 A vara i do laxamdak mi laxaalik teren dina ravasu ngan lubungkarun, la latkin teren nak lok naa. 10 A vara i do laxamdak mi laxaalik teren dina lok ngan luvuttadi singising panga; a vara i xusu dina sakala su midi boro at loogu tem dadas atdi. 11 A vara i do na laradi xapmek, do tevendinau go ren, mo luvuttadi na laradi xapmek ga dinau atdi, dina vot la dina lok ka axap lempanga ren; a vara i do limixin petpes bok dina lok ka mo lempanga ni ga gugu ka i. 12 A xopara tara na lox asu loklox anare rin, kopla na balamu mo laxamdak mi laxaalik teren melemu at lanmet at ne temen di. 13 A vara mo livipisik li ren dina met ut, la levenasen atdi dina sakpun kepe i ap mo laraola melemu. 14 A vara i do laxakapmek at lavalabat teren nak lok amisik at lodoxoma at Leeme Silok, la mo laxapmek at nenen, na nemen amisik la nemen gat di guta lok pes kepe i. 15 A vara mo laxapmek atdi nak lok amisik to melamgo at Leeme Silok la neni naba ra korop asu xepe nedi basinge lodoxoma at limixin.

16 Mo laradi xapmek goxom doma i do nak lok toloklox anare, ketla gak lox asongot limixin banbalo la gap sep amet di eburu mi limixin pakpakes la baava. 17 Neni ga vavara solo i xusu na lili lasaxaek; a vara i do mo laxasaxaek namlong mu i; neni goxopara i xusu nak lox anarong limixin; a vara i do teta noxo lox anarong i. 18 Neni gak lok momo rik lox asaxaek limixin, ngan lasakula ren; la a vara i do mo loklok asaxaek teren na suxuna amlong i ngan ladan la ngan bok ladan momonok i beles ukeneng at levesi ren. 19 A vara i do lasaxaek na nemen amisik eburu min ngan lavanga singsiga ren, la na ngan labanbaane diga sevut li i ren.

20 O Leeme Silok. A vara i do una mu asu mo langas la una lox asongot lavamunepen tarak, atla di xaxarang taba ia do nia laradi xapmek. 21 Ketla nenu Leeme Silok la Loorong Avolo. Una lok tooro ia kerekngan uga xaape min, la una lox asu ka ia basinge di mumu labalamu nunuan taram. 22 Nenia mun laradi banbalo la pakpakes, la no xeneng at lavatpeeve rak ing songot aleng tinotno. 23 La i auret do ana sonao mun ngan lovovo at laradi laxangking i soso rin ukantinao, la a lok ngan mun lasku lamanman i mas kepe i. 24 Luvatgulom tarak irang songot axap ta mila an mun an; la labantuxu rak ira gelegen ta la ira molobe nga. 25 Do limixin di ven ia, dik lok kalise ia; la do di ven kora ia, dira piripat patlak ta.

26 Leeme Silok ne Moroa rak. U ruuna labalamu lexen, kuren la una lok tooro ia la una lox asepsu ia basinge di. 27 Una lok lavamunepen tarak dinaklen i do nenu Leeme Silok, unaba lox asepsu ia basinge di. 28 Diba li lasaxaek tarak, ketla nenu uba lox anarong ia; a vara i do una lox amangan nedi limixin loklok asongot kusu nenia, lasaxaruki ram anaba lok momo. 29 A vara i do lavamunepen tarak dinaba ruuna ka lainmangan, la mo lainmangan naba suxuna di ngan lempanga singsiga atdi.

30 Nia anaba tong avukat amisik ti Leeme Silok la ana emi asu min kantubu at lovotpot buru at limixin. 31 Mila Leeme Silok i gagas amisik ti lok tooro limixin pakpakes; la ik lox asepsu nedi basinge limixin sepsep amet.